حکومت کا سانحہ پمز کے لواحقین کیلئے فی کس 50 لاکھ روپے معاوضے کا اعلان

وفاقی حکومت نے سانحہ پمز کے غمزدہ خاندانوں سے دلی اظہارِ یکجہتی کرتے ہوئے جان بحق ہونے والوں کے لواحقین کے لیے فی کس 50 لاکھ روپے مالی معاوضے کا اعلان کر دیا ہے۔ حکومت نے واضح کیا کہ مالی معاونت انسانی جانوں کا نعم البدل نہیں ہو سکتی، تاہم اس کا مقصد متاثرہ خاندانوں کی مشکلات کو کم کرنا اور ان کے دکھ کا مداوا کرنا ہے۔ دوسری جانب وزیراعظم کی جانب سے ریٹائرڈ وفاقی سیکرٹری شاہد خان کی سربراہی میں قائم کردہ اعلیٰ سطح کی تحقیقاتی کمیٹی نے واقعہ کی باقاعدہ تحقیقات کا آغاز کر دیا ہے۔ کمیٹی کے ارکان نے فائر بریگیڈ ہیڈ کوارٹر کا دورہ کر کے ریسکیو عملے کے بیانات قلمبند کیے اور آگ لگنے کے بعد ایمرجنسی رسپانس کی مکمل ٹائم لائن کا جائزہ لیا تاکہ حادثے کی وجوہات اور آپریشن میں درپیش رکاوٹوں کو سامنے لایا جا سکے۔