سانحہ پمز: بچوں کی اموات آکسیجن بند ہونے اور جھلسنے سے ہوئی، ابتدائی رپورٹ

اسلام آباد کے پمز ہسپتال انتظامیہ نے نرسری وارڈ میں پیش آنے والے آتشزدگی کے المناک سانحے کی ابتدائی رپورٹ تیار کر لی ہے۔ رپورٹ کے مطابق آگ نرسری میں بجلی کی تاروں میں شارٹ سرکٹ کے بعد سپارکنگ سے لگی، جس نے انکیوبیٹرز پر موجود آکسیجن پوائنٹس کے باعث چند ہی سیکنڈز میں شدید نوعیت اختیار کر لی۔ آگ کا دھواں پائپ کے ذریعے بچوں کے سانس میں گیا اور آکسیجن بند ہونے اور جھلسنے کے باعث 14 نومولود جاں بحق ہوئے۔ رپورٹ میں بتایا گیا ہے کہ صبح 6 بج کر 39 منٹ پر دھماکے کے بعد چھتیں گر گئیں، تاہم ڈیوٹی پر موجود عملے نے 35 فائر ایکسٹنگوشرز کی مدد سے آگ پر قابو پانے کی کوشش کی اور گائنی وارڈ سے 73 زیرِ علاج مریضوں، چند نومولود بچوں اور ان کی ماؤں کو محفوظ مقام پر منتقل کیا۔ انتظامیہ نے شفاف تحقیقات جاری رکھنے کے عزم کے ساتھ لواحقین سے گہرے دکھ کا اظہار کیا ہے۔