پمز میں بچوں کی ہلاکت پر اسلام آباد ہائیکورٹ میں ایک اور درخواست دائر

پاکستان انسٹی ٹیوٹ آف میڈیکل سائنسز (پمز) اسلام آباد میں آتشزدگی کے باعث 14 نوزائیدہ بچوں کی المناک ہلاکت پر اسلام آباد ہائیکورٹ میں آئین کے آرٹیکل 199 کے تحت ایک اور آئینی درخواست دائر کر دی گئی ہے۔ سپریم کورٹ کے وکیل نثار اے مجاہد کی جانب سے دائر کردہ عوامی مفاد کی اس درخواست میں وفاق، وزارتِ صحت، پمز، سی ڈی اے اور آئی جی اسلام آباد سمیت 13 اداروں کو فریق بنایا گیا ہے۔ درخواست میں مؤقف اختیار کیا گیا ہے کہ الیکٹریکل اور اے سی کی خرابی کے باعث لگنے والی آگ سے بے بس نوزائیدہ بچے خود کو بچانے کی صلاحیت نہیں رکھتے تھے، جبکہ آئین کے تحت مریضوں کی زندگی کا تحفظ ریاست کی ذمہ داری ہے۔ درخواست گزار نے استدعا کی ہے کہ واقعے کی تحقیقات کے لیے انجینئرز اور طبی ماہرین پر مشتمل آزاد کمیٹی قائم کی جائے، تمام سی سی ٹی وی فوٹیج و ریکارڈ محفوظ کیا جائے، اور اسلام آباد کے تمام وفاقی ہسپتالوں کا فوری جامع فائر آڈٹ اور باقاعدہ فائر ڈرلز کو یقینی بنایا جائے۔