پی آئی اے کے اثاثے ہزاروں ارب کےہیں ، اونے پونے داموں فروخت کیے گئے: چوہدری منظور

پاکستان پیپلز پارٹی کے سینئر رہنما اور پیپلز لیبر بیورو کے انچارج چوہدری منظور احمد نے قومی ائیر لائن پی آئی اے کی نجکاری پر شدید ردعمل دیتے ہوئے کہا ہے کہ حکومت قوم کو گمراہ کر رہی ہے اور پی آئی اے کے قیمتی قومی اثاثے اونے پونے داموں فروخت کیے گئے ہیں۔

چوہدری منظور نے اپنے بیان میں کہا کہ جس گھر کے برتن بیچ دیے جائیں، اس کی جیت کیسے ممکن ہو سکتی ہے۔ ان کا کہنا تھا کہ پی آئی اے پاکستان کا اثاثہ ہے جس کے مجموعی اثاثوں کی مالیت ہزاروں ارب روپے بنتی ہے، جبکہ گزشتہ سال پی آئی اے نے 26 ارب روپے کا منافع بھی کمایا تھا۔

ان کے مطابق پی آئی اے کے 30 طیارے تقریباً 100 ارب روپے کے ہیں، ملازمین کا پراویڈنٹ فنڈ 20 ارب روپے، جبکہ پی آئی اے کی 8 عمارتیں تقریباً 50 ارب روپے مالیت رکھتی ہیں۔ اس کے علاوہ 10 ارب روپے کے اسپیئر پارٹس اور ہینگرز بھی پی آئی اے کے اثاثوں میں شامل ہیں۔

چوہدری منظور کا کہنا تھا کہ پی آئی اے کی نجکاری سراسر ناانصافی اور ظلم ہے۔ انہوں نے کہا کہ پی آئی اے کا سیلری امپیکٹ صرف 16 فیصد ہے اور اس کے باوجود نجکاری کو جواز بنا کر پیش کیا جا رہا ہے۔ ان کے مطابق پی آئی اے کی نجکاری ایک بڑا اسکینڈل ثابت ہوگی۔

واضح رہے کہ عارف حبیب کنسورشیم نے قومی ائیر لائن پی آئی اے کو 135 ارب روپے میں خرید لیا ہے۔ کنسورشیم نے نجکاری کے تیسرے مرحلے میں 135 ارب روپے کی بولی دے کر پی آئی اے کے 75 فیصد شیئرز حاصل کر لیے ہیں۔