پی آئی اے کا لاہور اور مانچسٹر کے درمیان براہِ راست پروازوں کا آغاز

پاکستان انٹرنیشنل ایئرلائنز (پی آئی اے) نے لاہور اور مانچسٹر کے مابین براہِ راست پروازوں کا باقاعدہ آغاز کر دیا ہے، جس کے تحت 325 مسافروں کو لے کر پہلی افتتاحی پرواز پی کے 709 لاہور ایئرپورٹ سے روانہ ہو گئی۔ اس موقع پر ایئرپورٹ پر ایک سادہ مگر پروقار تقریب منعقد کی گئی، جہاں پی آئی اے کے چیف آپریٹنگ آفیسر خرم مشتاق نے مسافروں کو الوداع کیا۔

اس سے قبل مانچسٹر سے لاہور کے لیے پہلی پرواز گزشتہ رات روانہ ہوئی تھی، جسے پی آئی اے کی مقامی انتظامیہ اور مانچسٹر ایئرپورٹ گروپ نے رخصت کیا۔ ترجمان کے مطابق، اس نئی پرواز کے آغاز کے بعد پاکستان اور مانچسٹر کے مابین پی آئی اے کی ہفتہ وار پروازوں کی کل تعداد 5 ہو گئی ہے، جن میں سے 4 پروازیں اسلام آباد اور 1 لاہور سے آپریٹ کی جائے گی۔ برطانیہ میں مقیم پاکستانی کمیونٹی نے اس براہِ راست فضائی رابطے کی بحالی کا بھرپور خیرمقدم کیا ہے۔