نادرا کا ب فارم کے بارے میں اہم فیصلہ

اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے فیملی ٹری کو مزید محفوظ اور مستند بنانے کے لیے اہم اقدامات کا اعلان کر دیا ہے۔ نادرا کے مطابق بچوں کے بے فارم کے اجرا کے طریقہ کار میں تبدیلیاں متعارف کرائی گئی ہیں تاکہ فیملی ریکارڈ میں کسی غیر متعلقہ شخص کے اندراج کو روکا جا سکے۔

نادرا کے مطابق اب 3 سے 10 سال کی عمر کے بچوں کے بے فارم پر تصویر لگانا لازمی ہوگا، جبکہ 10 سے 18 سال کی عمر کے بچوں کے فنگر پرنٹس بھی لیے جائیں گے۔ تاہم 3 سال تک کی عمر کے بچوں کے بے فارم کے لیے تصویر فراہم کرنا ضروری نہیں ہوگا۔

نادرا نے مزید بتایا کہ بچے کی پیدائش کے ایک ماہ کے اندر اس کا اندراج متعلقہ یونین کونسل میں کرانا لازم ہوگا۔ اس اقدام کا مقصد بچوں کے ڈیٹا کو بروقت اور درست طریقے سے قومی ریکارڈ کا حصہ بنانا ہے۔

نادرا حکام کے مطابق ان اقدامات کا بنیادی مقصد فیملی ٹری کو محفوظ بنانا اور کسی بھی غیر متعلقہ فرد کے اندراج کے امکانات کو ختم کرنا ہے۔ نادرا نے شہریوں سے اپیل کی ہے کہ وہ نئے قواعد کے مطابق اپنے بچوں کے اندراج اور دستاویزات کی تکمیل بروقت یقینی بنائیں تاکہ مستقبل میں کسی بھی قسم کی قانونی یا انتظامی مشکلات سے بچا جا سکے