پی ایچ سی سی کا اتائیوں کیخلاف کریک ڈاؤن، ایک ماہ میں مزید 646 غیر قانونی مراکز سیل

پنجاب ہیلتھ کیئر کمیشن (پی ایچ سی) نے صوبے بھر میں اتائیت کے خاتمے کے لیے اپنی کارروائیاں مزید تیز کر دی ہیں، جس کے تحت صرف ماہِ جون کے دوران مختلف اضلاع میں 2,837 چھاپے مارے گئے اور 646 غیر قانونی علاج گاہوں و مراکز کو سربمہر (سیل) کر دیا گیا۔

ترجمان پنجاب ہیلتھ کیئر کمیشن کی جانب سے جاری کردہ تفصیلات کے مطابق، صوبائی دارالحکومت لاہور میں سب سے بڑی کارروائی عمل میں لائی گئی جہاں ریکارڈ 457 چھاپے مار کر 142 اتائیوں کے کاروبار بند کیے گئے۔

ترجمان نے مزید بتایا کہ فیصل آباد میں انسدادِ اتائیت ٹیموں نے 123 مقامات پر کارروائی کرتے ہوئے 32 غیر قانونی طبی مراکز کو بند کیا۔ اس کے علاوہ سرگودھا میں 17، راجن پور میں 27، قصور میں 43 جبکہ گوجرانوالہ اور سیالکوٹ میں 23، 23 اتائی مراکز کو سیل کر کے سیل شدہ عمارتوں پر قانونی نوٹس چسپاں کر دیے گئے ہیں۔ کمیشن کا کہنا ہے کہ انسانی جانوں سے کھیلنے والے ان عناصر کے خلاف بلاامتیاز کارروائیاں جاری رہیں گی