عالمی سطح پر پٹرولیم قیمتیں کم ہوتے ہی پاکستان میں بھی کم ہوں گی: علی پرویز ملک

وفاقی وزیرِ پٹرولیم علی پرویز ملک نے کہا ہے کہ عالمی مارکیٹ میں خام تیل کی قیمتیں کم ہوتے ہی پاکستان میں بھی عوام کو پٹرولیم مصنوعات پر مزید ریلیف دیا جائے گا، جبکہ وزیراعظم نے پہلے ہی عوام کو فی لٹر 100 روپے کا تاریخی ریلیف فراہم کیا ہے۔ میڈیا سے گفتگو کرتے ہوئے انہوں نے کہا کہ وزیراعظم شہباز شریف اس مشکل معاشی گھڑی میں عوام کا ساتھ ہرگز نہیں چھوڑیں گے اور اگر یہ ریلیف اسکیم اگلے 10 ماہ تک جاری رہی تو وزیراعظم اور ان کی کابینہ اپنی مراعات میں کٹوتی کر کے بھی عوام کو سہولت فراہم کرتی رہے گی۔

علی پرویز ملک نے کہا کہ موجودہ حکومت پاکستان کو دیوالیہ ہونے سے بچا چکی ہے اور کسی کو یہ غلط فہمی نہیں ہونی چاہیے کہ اسلام آباد پر یلغار کر کے حکومت پر دباؤ ڈالا جا سکتا ہے کیونکہ ریاست اتنی کمزور نہیں۔ وزیراعلیٰ خیبر پختونخوا کے حالیہ بیان پر ردِعمل دیتے ہوئے وفاقی وزیر نے کہا کہ وقت کا اہم تقاضا ہے کہ سہیل آفریدی سیاسی بیانات بازی کے بجائے اپنے صوبے کے شہداء کے جنازوں میں شریک ہوں اور امن و امان کی صورتحال پر توجہ دیں۔