پیٹرول پمپ مالکان کا ڈیلی پرائس میکانزم پر ایک بار پھر تحفظات کا اظہار

پٹرولیم مصنوعات کی قیمتوں میں روزانہ کی بنیاد پر ردوبدل (Daily Price Mechanism) کے فیصلے پر آل پاکستان پیٹرول پمپ اونرز ایسوسی ایشن نے ایک بار پھر شدید تحفظات کا اظہار کرتے ہوئے وفاقی وزیرِ پٹرولیم علی پرویز ملک کو خط لکھ دیا ہے۔

ایسوسی ایشن کے وائس چیئرمین نعمان علی بٹ کی جانب سے لکھے گئے خط میں وفاقی وزیر سے فوری ملاقات کا وقت مانگا گیا ہے۔ خط کے متن میں موقف اپنایا گیا ہے کہ پٹرولیم مصنوعات کی قیمتوں میں مسلسل اور بار بار تبدیلی سے پٹرول پمپ مالکان کو سنگین مالی نقصانات کا سامنا کرنا پڑ رہا ہے اور موجودہ اسٹاک کی مالیت کے تعین میں شدید مشکلات پیش آ رہی ہیں۔ مزید برآں، روزانہ کی بنیاد پر قیمت بدلنے سے کیش فلو اور انوینٹری کا نظام متاثر ہو رہا ہے جس سے کاروباری امور اور خریدو فروخت میں غیر یقینی صورتحال پیدا ہو چکی ہے۔

ایسوسی ایشن نے مطالبات پیش کرتے ہوئے کہا ہے کہ پٹرولیم مصنوعات کی قیمتوں کے تعین کے لیے ایک شفاف اور قابلِ عمل نظام وضع کیا جائے جس میں پٹرول پمپ مالکان سے مشاورت کو یقینی بنایا جائے تاکہ عوام کو پٹرولیم مصنوعات کی بلاتعطل فراہمی کے ساتھ ساتھ مالکان کے مفادات کا تحفظ بھی ممکن ہو سکے۔