حکومت کا پیٹرول اور ڈیزل 55، 55 روپے فی لیٹر مہنگا کرنے کا اعلان

حکومت نے پیٹرولیم مصنوعات کی قیمتوں میں بڑا اضافہ کر دیا ہے اور پیٹرول اور ڈیزل کی قیمت میں فی لیٹر 55 روپے اضافہ کر دیا گیا ہے۔

نائب وزیراعظم اسحاق ڈار، وزیر خزانہ محمد اورنگزیب اور وزیرِ پیٹرولیم علی پرویز ملک نے مشترکہ پریس کانفرنس میں اس فیصلے کا اعلان کیا۔

اسحاق ڈار نے کہا کہ خطے میں جاری کشیدگی اور جنگی صورتحال کے باعث عالمی منڈی میں پیٹرولیم مصنوعات کی قیمتوں میں غیر معمولی اضافہ ہو رہا ہے۔ انہوں نے کہا کہ وزیراعظم اس صورتحال پر مسلسل نظر رکھے ہوئے ہیں اور آج انہوں نے خود اجلاس کی صدارت کرتے ہوئے حالات کا جائزہ لیا۔

انہوں نے بتایا کہ حکومت نے مختلف آپشنز پر غور کیا اور کوشش کی کہ قیمتوں میں اضافہ متوازن رکھا جائے۔ اسحاق ڈار کے مطابق پاکستان خطے میں کشیدگی کم کرنے کے لیے سفارتی کوششیں بھی کر رہا ہے اور مختلف ممالک کے وزرائے خارجہ سے رابطے کیے گئے ہیں۔

انہوں نے کہا کہ وزیراعظم اور فیلڈ مارشل بھی اپنے ہم منصبوں سے رابطے میں ہیں تاکہ کشیدگی کو کم کیا جا سکے۔

وزیرِ پیٹرولیم علی پرویز ملک نے کہا کہ ملک اس وقت غیر معمولی حالات سے گزر رہا ہے اور پڑوسی خطے میں پیدا ہونے والی صورتحال نے پورے علاقے کو متاثر کیا ہے۔

انہوں نے بتایا کہ حکومت نے ممکنہ حالات کو مدنظر رکھتے ہوئے پہلے ہی پیٹرولیم مصنوعات کے ذخائر میں اضافہ کر دیا تھا تاکہ ملک میں سپلائی برقرار رکھی جا سکے۔

علی پرویز ملک نے کہا کہ پیٹرول اور ڈیزل کی قیمت میں فی لیٹر 55 روپے اضافہ ایک مشکل فیصلہ ہے جو مجبوری کے تحت کرنا پڑا۔ انہوں نے یقین دہانی کرائی کہ جیسے ہی عالمی صورتحال بہتر ہوگی حکومت اسی رفتار سے قیمتوں میں کمی بھی کرے گی۔

انہوں نے مزید کہا کہ آئندہ پیٹرولیم مصنوعات کی قیمتوں کا ہفتہ وار بنیادوں پر جائزہ لیا جائے گا۔

حکومت کی جانب سے اضافے کے بعد پیٹرول کی نئی قیمت 321 روپے 17 پیسے فی لیٹر جبکہ ڈیزل کی نئی قیمت 335 روپے 86 پیسے فی لیٹر مقرر کر دی گئی ہے۔