سانحہ پشاور: تین رکنی تحقیقاتی کمیٹی نے رپورٹ کمشنر کو جمع کرا دی

سانحہ پشاور کی تحقیقات کے لیے قائم کردہ 3 رکنی تحقیقاتی کمیٹی نے اپنی مکمل رپورٹ کمشنر پشاور کو جمع کرا دی ہے۔

کمیٹی کے ارکان نے جائے حادثہ اور ہسپتال کا خود دورہ کر کے شواہد اکٹھے کیے۔ ذرائع کے مطابق تحقیقاتی رپورٹ میں غفلت برتنے پر متاثرہ سکول کی رجسٹریشن فوری منسوخ کرنے کی سفارش کی گئی ہے۔ رپورٹ کے مطابق مذکورہ سکول کی رجسٹریشن رواں سال 2026ء میں ہی ہوئی تھی اور وہاں 380 طلبا و طالبات زیرِ تعلیم تھے۔

تحقیقات کے دوران ایک سنسنی خیز انکشاف یہ بھی سامنے آیا کہ خیبرپختونخوا میں سکولوں کی خستہ حال یا خطرناک عمارتوں کی انسپکشن کرنے اور انہیں سیل کرنے کا قانونی اختیار اس وقت کسی بھی ادارے کے پاس نہیں ہے، کیونکہ پی ٹی آئی کے گزشتہ دورِ حکومت میں پرائیویٹ سکول ریگولیٹری اتھارٹی (PSRA) سے یہ اختیارات واپس لے لیے گئے تھے۔ رپورٹ کے مطابق صوبے میں 12 ہزار سے زائد سکولوں کی عمارتیں مخدوش ہیں، جن میں صرف پشاور کے 3 مزید سکول انتہائی خطرناک حالت میں موجود ہیں۔ واقعے کے بعد کے پی حکومت نے صوبے بھر کے نجی سکولوں کی عمارتوں کی فائر و اسٹرکچرل سیفٹی کے معائنے کے لیے خصوصی کمیٹیاں تشکیل دینے کا فیصلہ کیا ہے۔