پشاور میں مختلف سڑکوں پر کنٹینرز لگا کر راستے بند

خیبرپختونخوا کے دارالحکومت پشاور میں سیکیورٹی خدشات اور ممکنہ سیاسی احتجاج و کشیدگی کے پیشِ نظر مختلف اہم شاہراہوں پر بھاری کنٹینرز لگا کر راستے بند کر دیے گئے ہیں۔ پشاور کے کلیدی مقامات بشمول باچا خان چوک، خیبر روڈ اور فردوس چوک کو کنٹینرز کھڑے کر کے ہر قسم کے ٹریفک کے لیے مکمل طور پر بلاک کر دیا گیا ہے، جس کے باعث شہریوں کو آمدورفت میں شدید مشکلات کا سامنا ہے۔

سڑکوں کی بندش اور سیکیورٹی کی بدلتی ہوئی صورتحال کے باعث بس ریپڈ ٹرانزٹ (بی آر ٹی) انتظامیہ نے مسافروں کی حفاظت کے پیشِ نظر بی آر ٹی سروس کو عارضی طور پر معطل کرنے کا اعلان کیا ہے۔ ترجمان ٹرانس پشاور کا کہنا ہے کہ بی آر ٹی کا تمام عملیہ متعلقہ اسٹیشنز پر موجود ہے اور انتظامیہ سیکیورٹی اداروں کے ساتھ مل کر حالات کا مسلسل جائزہ لے رہی ہے، صورتحال بہتر ہوتے ہی سروس کی مکمل بحالی کے حوالے سے فیصلہ کیا جائے گا۔