پشاور ہائیکورٹ کی سہیل آفریدی کے وکلاء کو آخری وارننگ

پشاور ہائیکورٹ میں ہری پور ضمنی الیکشن میں سرکاری افسران کے خلاف بیان بازی کے معاملے پر الیکشن کمیشن کے نوٹس کے خلاف دائر سہیل آفریدی کی درخواست کی سماعت 7 اکتوبر تک ملتوی کر دی گئی ہے۔ جسٹس ارشد علی اور جسٹس محمد فہیم ولی پر مشتمل بینچ نے کیس کی سماعت کی، جہاں درخواست گزار کے وکیل نے نیا وکالت نامہ جمع کرانے کا عذر پیش کرتے ہوئے سماعت ملتوی کرنے کی استدعا کی۔ الیکشن کمیشن کے ایڈیشنل ڈائریکٹر جنرل لا خرم ذیشان نے بار بار سماعت ملتوی کرنے پر سخت اعتراض کرتے ہوئے عدالت کو بتایا کہ اس بنیاد پر کیس اب تک چھ بار ملتوی ہو چکا ہے اور ای سی پی میں بھی اس پر میرٹ پر کارروائی ہو چکی ہے۔ عدالت نے درخواست گزار کے وکلاء کو آخری وارننگ دیتے ہوئے واضح کیا کہ آج کے بعد کسی صورت سماعت ملتوی کرنے کی درخواست قبول نہیں کی جائے گی اور اگر آئندہ کوئی پیش نہ ہوا تو عدالت قانون کے مطابق فیصلہ کرے گی۔