پشاور ہائیکورٹ کا پی ٹی آئی احتجاج سے سڑکوں کی بندش پر اظہارِ برہمی، فوری کارروائی کا حکم

پشاور: پشاور ہائیکورٹ نے پی ٹی آئی کے احتجاج کے دوران سڑکوں کی بندش پر سخت ردعمل ظاہر کرتے ہوئے حکم دیا ہے کہ تمام سڑکیں فی الفور کھولی جائیں اور کل رپورٹ جمع کرائی جائے۔

پی ٹی آئی احتجاج کی وجہ سے سڑکیں بند کرنے کے خلاف دائر درخواست پر سماعت جسٹس اعجاز انور اور جسٹس فرح جمشید کی بینچ نے کی۔ چیف سیکرٹری خیبرپختونخوا اور آئی جی خیبرپختونخوا بھی عدالت میں پیش ہوئے۔

سماعت کے دوران ایڈووکیٹ جنرل نے بتایا کہ پارلیمنٹرین اسلام آباد میں سپریم کورٹ کے حکم پر عمل درآمد کرانے گئے ہیں، جس پر عدالت نے کہا کہ اسلام آباد ہماری ڈومین میں نہیں آتا، احتجاج کرنے والوں کے خلاف فوری کارروائی کی جائے۔

عدالت نے آئی جی سے استفسار کیا کہ کتنے دن سے سڑکیں بند ہیں، آئی جی نے بتایا کہ پہلے 16 پوائنٹس پر احتجاج تھا جسے کم کر کے 10 پوائنٹس تک محدود کیا گیا۔ عدالت نے کہا کہ موٹر وے بند ہونا قانون کی خلاف ورزی ہے اور یہ شہریوں کے لیے خطرناک ہے۔

جسٹس اعجاز انور نے کہا کہ سڑکیں بند ہونے سے پورا پشاور جام ہو جاتا ہے، اکثر مقامات پر ٹریفک اہلکار بھی موجود نہیں ہوتے۔ عدالت نے چیف سیکرٹری سے کہا کہ جہاں ایکشن لینا ہو فوری کارروائی کریں، خیبرپختونخوا کے شہریوں کو تکلیف دی جارہی ہے اور صوبے میں بدامنی کے واقعات بڑھ رہے ہیں۔عدالت عالیہ نے حکم دیا کہ تمام سڑکیں فوری کھول دی جائیں اور کل رپورٹ جمع کرائی جائے۔