سانحہ پشاور کے بعد اسکولوں کے معائنے کا عمل شروع ، کئی عمارتیں خستہ حال قرار

سانحہ پشاور دیر کالونی کے خوفناک حادثے کے بعد خیبر پختونخوا میں تعلیمی اداروں کی عمارتوں کی سیکیورٹی اور ڈھانچے کی جانچ کا عمل تیز کر دیا گیا ہے، جس کے دوران متعدد اضلاع میں سرکاری و نجی اسکولوں کی عمارتیں شدید خستہ حال اور خطرہ پائی گئی ہیں۔

تین دن قبل پشاور کے علاقے دیر کالونی سعید آباد میں ‘الخیر ایجوکیشن سسٹم’ نامی نجی اسکول کی چھت گرنے سے 32 بچے اور 2 خاتون اساتذہ جاں بحق جبکہ 40 سے زائد بچے شدید زخمی ہو گئے تھے۔ واقعے کے وقت اسکول میں 110 بچے موجود تھے۔ درج ایف آئی آر کے مطابق معصوم بچوں نے حادثے سے قبل مالکان کو عمارت کی بوسیدگی سے آگاہ کیا تھا لیکن ان کی بات پر توجہ نہیں دی گئی۔ 2024 میں لیز پر حاصل کیے گئے 16 مرلے کے پلاٹ پر ناقص مٹیریل سے تعمیر کی گئی اس عمارت کے گرنے پر پولیس نے اسکول کے مالکان اور ٹھیکیدار کے خلاف مقدمہ درج کر کے مرکزی مالک کو گرفتار کر لیا ہے۔

سانحے کے فوراً بعد خیبر پختونخوا حکومت کی ہدایت پر محکمہ تعلیم نے شہریوں سے سوشل میڈیا پر بوسیدہ اسکولوں کی ویڈیوز شیئر کرنے کی اپیل کی تھی، جس کے بعد موصول ہونے والی رپورٹس میں ہولناک حقائق سامنے آئے ہیں۔ محکمہ تعلیم کی ابتدائی رپورٹ کے مطابق بونیر کے بدال اسکول کے 4، چارسدہ کے 3 اسکولوں کے 15، اور لوئر دیر میں لڑکوں کے 3 سرکاری اسکولوں کی عمارتیں بالکل ناقابلِ استعمال قرار دی گئی ہیں۔ علاوہ ازیں کرک، لکی مروت، مردان، ڈیرہ اسماعیل خان (جہاں 25 کلاس رومز) اور ہری پور کے لڑکیوں کے 3 اسکولوں کی عمارتوں کو مکمل طور پر بوسیدہ اور خطرناک قرار دے دیا گیا ہے۔