پیپلز پارٹی پنجاب میں بلدیاتی انتخابات بھرپور طریقے سے لڑے گی، صدر آصف علی زرداری

لاہور: صدر مملکت آصف علی زرداری لاہور کے دورے کے چوتھے روز بلاول ہاؤس لاہور میں سیاسی سرگرمیوں میں مصروف رہے۔ صدر آصف علی زرداری سے گورنر پنجاب سردار سلیم حیدر خان اور پاکستان پیپلز پارٹی کے مختلف رہنماؤں نے ملاقات کی، جس میں ملکی اور سیاسی امور پر تفصیلی تبادلہ خیال کیا گیا۔

صدر مملکت نے پارٹی رہنماؤں سے گفتگو کرتے ہوئے ہدایت کی کہ پنجاب میں عوامی رابطہ مہم کو مزید منظم اور مؤثر بنایا جائے۔ انہوں نے کہا کہ پاکستان پیپلز پارٹی ملکی استحکام کی ضمانت ہے اور اپنے اصولی مؤقف پر قائم ہے۔ صدر زرداری نے واضح کیا کہ پیپلز پارٹی پنجاب میں بلدیاتی انتخابات میں بھرپور طریقے سے حصہ لے گی اور جس طرح سندھ میں کامیابیاں حاصل کیں، اسی طرح پنجاب میں بھی بلدیاتی انتخابات میں کامیابی حاصل کرے گی۔

صدر آصف علی زرداری نے پارٹی رہنماؤں اور کارکنان کو بلدیاتی انتخابات کی تیاریوں میں تیزی لانے کی ہدایت کرتے ہوئے کہا کہ پیپلز پارٹی بھٹو خاندان کے افکار اور نظریات پر کاربند ہے اور عوامی حقوق کے لیے جدوجہد جاری رکھے گی۔

بعد ازاں بلاول ہاؤس لاہور میں صدر مملکت سے پارٹی کی اہم شخصیات نے بھی ملاقاتیں کیں، جن میں پیپلز پارٹی کے رہنما عبدالقادر شاہین، نواب شہزاد، عزیز الرحمان چن اور صوبہ سندھ سے آئے ہوئے وفد شامل تھے۔ ملاقاتوں کے دوران ملکی سیاسی صورتحال اور پارٹی امور پر مشاورت کی گئی۔