پینٹاگون کا پیٹریاٹ اور تھاڈ میزائل سسٹمز کی پیداوار بڑھانے کا فیصلہ

امریکی محکمہ دفاع (پینٹاگون) نے ملک کے میزائل دفاعی نظام کی استعداد کار میں اضافے کے لیے دفاعی سازوسامان بنانے والی معروف کمپنیوں ‘لاک ہیڈ مارٹن’ اور ‘نارتھروپ گرومن’ کے ساتھ ایک اہم فریم ورک معاہدہ طے کر لیا ہے۔ غیر ملکی خبر رساں ادارے کی رپورٹ کے مطابق اس معاہدے کے تحت PAC-3 پیٹریاٹ اور تھاڈ (THAAD) انٹرسیپٹر میزائلوں کے پرزہ جات کی پیداوار میں نمایاں اضافہ کیا جائے گا، جس کے لیے پینٹاگون نے کمپنیوں کو پیداواری عمل تیز کرنے کی باقاعدہ ہدایت بھی جاری کر دی ہے۔ رپورٹ کے مطابق مشرقِ وسطیٰ اور یوکرین میں جاری جنگوں اور بڑھتے ہوئے عالمی تنازعات کے باعث امریکی میزائل ذخائر پر شدید دباؤ ہے، جس سے نمٹنے اور اپنی دفاعی سپلائی چین کو مضبوط بنانے کے لیے امریکا نے پیداواری صلاحیت میں توسیع کا عمل تیز کر دیا ہے۔