پنجاب کے بیشتر اضلاع میں 10 سے 14 اکتوبر تک بارشوں کی پیشگوئی

پرووینشل ڈیزاسٹر مینجمنٹ اتھارٹی (پی ڈی ایم اے) پنجاب نے مغربی ہواؤں کے سلسلے کے تحت 10 سے 14 اکتوبر کے دوران صوبے بھر میں تیز ہواؤں اور گرج چمک کے ساتھ بارشوں کا الرٹ جاری کر دیا ہے۔ ترجمان پی ڈی ایم اے کے مطابق لاہور، راولپنڈی، مری، گلیات، فیصل آباد، ملتان اور دیگر اضلاع میں وقفے وقفے سے بارش کا امکان ہے۔ ڈی جی پی ڈی ایم اے سیف انور جپہ نے مری اور دیگر پہاڑی علاقوں میں لینڈ سلائیڈنگ کے خدشے کے پیش نظر تمام ضلعی انتظامیہ اور متعلقہ محکموں کو مکمل الرٹ رہنے کی ہدایت کی ہے۔ انہوں نے شہریوں سے اپیل کی ہے کہ خراب موسم کے دوران غیر ضروری سفر سے گریز کریں، کچے اور بوسیدہ مکانات میں رہنے سے بچیں، اور کسی بھی ہنگامی صورتحال میں پی ڈی ایم اے کی ہیلپ لائن 1129 پر رابطہ کریں۔