اقوام متحدہ میں شہباز شریف کا خطاب فلسطینی مشن نے سوشل میڈیا پر نمایاں کر دیا

اقوام متحدہ میں فلسطینی مشن نے وزیراعظم پاکستان محمد شہباز شریف کے الفاظ کو اپنے آفیشل سوشل میڈیا پلیٹ فارمز پر انتہائی نمایاں انداز میں شیئر کیا ہے اور ان کے دوٹوک مؤقف کو سراہا ہے۔

فلسطینی مشن کی جانب سے جاری کردہ بیان میں کہا گیا ہے کہ وزیراعظم شہباز شریف نے اقوام متحدہ کی جنرل اسمبلی کے اجلاس سے اپنے خطاب کے دوران فلسطین کا خصوصی ذکر کیا اور غزہ میں فلسطینی خواتین، معصوم بچوں اور بزرگوں پر ہونے والے بہیمانہ مظالم کو عالمی ضمیر کے سامنے انتہائی مؤثر انداز میں اجاگر کیا۔

وزیراعظم شہباز شریف نے اپنے خطاب کے دوران گزشتہ سال ‘ہند رجب’ نامی اس فلسطینی بچی کی دل دہلا دینے والی المناک داستان کا ذکر کیا جسے اسرائیلی قابض فوجیوں نے بے دردی سے شہید کر دیا تھا۔ انہوں نے دنیا کو یہ باور کرایا کہ اس سال ایک اور دلخراش سانحہ پوری دنیا اور ہمارے دلوں پر ایک بھاری بوجھ بن چکا ہے، جہاں محض 8 سال کی معصوم ‘وفا عقیلہ’ اس جاری بے مقصد جارحیت کا نشانہ بن کر اپنی جان گنوا بیٹھی۔ وزیراعظم نے جذباتی انداز میں بتایا کہ وفا عقیلہ کا سکول کا پہلا دن ہی اس کی زندگی کا آخری دن ثابت ہوا۔

وزیراعظم شہباز شریف نے عالمی برادری سے یہ سلگتا ہوا سوال کیا کہ کیا غزہ کی زمین پر پیدا ہونے والے کسی بھی بچے کو دنیا کے دیگر تمام بچوں کی طرح ایک پرامن زندگی گزارنے، اپنا روشن مستقبل بنانے اور خواب دیکھنے کا بنیادی حق حاصل نہیں ہے؟