ہم برائے فروخت نہیں، دنیا بدمعاش ریاست کو مسترد کرے: فلسطینی وزارت خارجہ

فلسطینی وزارتِ خارجہ نے دو ٹوک پیغام جاری کرتے ہوئے کہا ہے کہ فلسطین کی سرزمین “برائے فروخت” نہیں ہے اور اسرائیل اپنے مذموم مقاصد کے حصول میں کبھی کامیاب نہیں ہوگا۔

سماجی رابطے کی ویب سائٹ (ایکس) پر جاری کردہ ایک سخت ردِعمل میں فلسطینی وزارتِ خارجہ نے واضح کیا کہ فلسطینی عوام اپنی سرزمین پر ڈٹے ہوئے ہیں اور نسل پرست آبادکار حملہ آوروں کو بالآخر یہ ملک چھوڑنا ہوگا۔ بیان میں عالمی برادری پر زور دیا گیا کہ اب وقت آگیا ہے کہ دنیا ایسی بدمعاش ریاست کو مسترد کرے جو روزانہ کی بنیاد پر بین الاقوامی قوانین کی دھجیاں اڑا رہی ہے اور انسانیت سوز نسل پرستانہ اقدامات میں ملوث ہے۔

وزارتِ خارجہ نے مزید کہا کہ عالمی برادری کو متحد ہوکر ان دہشت گرد آبادکاروں کا مقابلہ کرنا ہوگا جو اس خام خیالی میں مبتلا ہیں کہ وہ فلسطین کی تاریخی حقیقت کو مٹا کر اپنے توسیع پسندانہ منصوبے فلسطینی عوام پر مسلط کر سکتے ہیں۔ بیان کے آخر میں اعادہ کیا گیا کہ فلسطینیوں کی جدوجہد آزادی کو دبایا نہیں جا سکتا۔