فلسطین کے لیے پاکستان کی 27ویں امدادی کھیپ روانہ

وزیراعظم پاکستان کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) نے فلسطین کے لیے مزید امدادی سامان روانہ کر دیا ہے۔ 100 ٹن امدادی سامان پر مشتمل مجموعی طور پر 27ویں امدادی کھیپ الخدمت فاؤنڈیشن کے تعاون سے بھیجی گئی۔

امدادی سامان کو خصوصی پرواز کے ذریعے علامہ اقبال انٹرنیشنل ایئرپورٹ لاہور سے روانہ کیا گیا۔ روانہ کیے گئے سامان میں کمبل، ترپال، کپڑے اور خواتین کے لیے ضروری سامان پر مشتمل کٹس شامل ہیں، جو متاثرہ فلسطینی عوام کی بنیادی ضروریات پوری کرنے میں مددگار ثابت ہوں گی۔حکام کے مطابق اب تک 27 امدادی کھیپوں کے ذریعے فلسطین کے لیے بھیجی جانے والی امداد کا مجموعی وزن 2627 ٹن تک پہنچ چکا ہے، جو پاکستان کی جانب سے جاری انسانی ہمدردی کی کوششوں کا مظہر ہے۔سامان کی روانگی کی تقریب میں وزیرِ خزانہ پنجاب ایم پی اے میاں مجتبیٰ شجاع الرحمٰن اور وزیرِ ہاؤسنگ پنجاب ایم پی اے میاں بلال یاسین نے بطور مہمانِ خصوصی شرکت کی۔ اس موقع پر این ڈی ایم اے، وزارت خارجہ کے افسران، حکومتی نمائندگان اور الخدمت فاؤنڈیشن کے عہدیداران بھی موجود تھے۔تقریب سے خطاب کرتے ہوئے مقررین نے کہا کہ حکومت پاکستان اور پاکستانی عوام اس مشکل وقت میں فلسطین کے عوام کے ساتھ کھڑے ہیں اور انسانی ہمدردی کی بنیاد پر امداد کا سلسلہ جاری رکھا جائے گا۔