پاکستان نے علاقائی استحکام کے فروغ کیلئے مؤثر کردار ادا کیا: رضوان سعید

امریکا میں تعینات پاکستانی سفیر رضوان سعید شیخ نے یونیورسٹی آف کیلیفورنیا، برکلے میں طلبہ سے خطاب کرتے ہوئے کہا ہے کہ پاکستان جنوبی ایشیا، مشرقِ وسطیٰ اور دیگر ملحقہ خطوں میں علاقائی استحکام کے فروغ کے لیے مسلسل مؤثر کردار ادا کرتا رہا ہے۔ انہوں نے کہا کہ علاقائی کشیدگی اور جغرافیائی سیاسی تنازعات کے پاکستان کی قومی سلامتی، معیشت اور معاشرے پر گہرے اور دیرپا اثرات مرتب ہوئے ہیں، جبکہ ملک کو سیلاب اور دیگر موسمیاتی تبدیلیوں سے شدید چیلنجز کا سامنا ہے۔ سفیر پاکستان نے افغانستان، دہشت گردی، بارڈر مینجمنٹ اور معاشی پالیسیوں کے موضوعات پر گفتگو کرتے ہوئے اس عزم کا اعادہ کیا کہ متعدد بحرانوں کے باوجود پاکستانی قوم نے غیر معمولی استقامت کا مظاہرہ کیا ہے اور وہ خطے میں امن، خوشحالی اور ترقی کے لیے کوشاں ہے۔