ملک کے بالائی علاقوں میں بارش اور برفباری، سڑکوں کی بندش اور لینڈ سلائیڈنگ کا خدشہ

محکمہ موسمیات کے مطابق ملک کے بیشتر علاقوں میں موسم سرد اور بارش کے ساتھ برقرار رہنے کا امکان ہے، جبکہ بالائی علاقوں میں بارش اور برفباری کا سلسلہ جاری ہے۔

بالائی خیبر پختونخوا، خطہ پوٹھوہار، کشمیر اور گلگت بلتستان میں بارش متوقع ہے جبکہ بلند پہاڑی علاقوں میں برفباری کا امکان ظاہر کیا گیا ہے۔
اسلام آباد میں موسم سرد رہے گا اور گرج چمک کے ساتھ بارش ہونے کا امکان ہے۔

خیبر پختونخوا کے مختلف اضلاع جن میں چترال، دیر، سوات، شانگلہ، کوہستان، ایبٹ آباد، بونیر، باجوڑ، مہمند اور خیبر شامل ہیں، وہاں بارش متوقع ہے۔

محکمہ موسمیات کے مطابق پنجاب کے بیشتر اضلاع میں موسم سرد اور خشک رہنے کا امکان ہے، تاہم مری اور گلیات میں بارش اور ہلکی برفباری متوقع ہے۔
راولپنڈی، اٹک، جہلم، چکوال، لاہور، گجرات اور گوجرنوالہ میں بارش کا امکان ظاہر کیا گیا ہے۔

سندھ کے بیشتر اضلاع میں موسم سرد اور خشک رہے گا، جبکہ بلوچستان کے شمالی اضلاع میں شدید سردی کا امکان ہے۔
کشمیر اور گلگت بلتستان میں وقفے وقفے سے بارش اور برفباری کا سلسلہ جاری رہنے کی پیش گوئی کی گئی ہے۔

محکمہ موسمیات کے مطابق بالائی علاقوں میں بارش اور برفباری اگلے 2 سے 4 گھنٹے تک جاری رہ سکتی ہے، جس کے باعث بعض علاقوں میں سڑکیں بند ہونے، ٹریفک میں تعطل، لینڈ سلائیڈنگ اور برفانی تودے گرنے کا خدشہ ہے۔
محکمہ موسمیات نے سیاحوں اور مسافروں کو دورانِ سفر احتیاطی تدابیر اختیار کرنے کی ہدایت کی ہے۔