پرو ہاکی لیگ: پاکستان اور بھارت کی ٹیمیں آج لندن میں مدمقابل ہونگی

بین الاقوامی ہاکی فیڈریشن (ایف آئی ایچ) پرو ہاکی لیگ میں روایتی حریف پاکستان اور بھارت کی ٹیمیں آج لندن کے میدان میں ایک بار پھر ایک دوسرے کے خلاف صف آرا ہوں گی۔ دونوں ٹیموں کے درمیان یہ سنسنی خیز اور ہائی وولٹیج میچ پاکستانی وقت کے مطابق رات 10 بجے شروع ہوگا۔ شائقینِ کرکٹ کی طرح ہاکی کے چاہنے والوں کو بھی پاک بھارت ٹاکرے کا بے صبری سے انتظار ہے۔ قومی ہاکی ٹیم نے اب تک پرو ہاکی لیگ میں مجموعی طور پر 14 میچز کھیلے ہیں اور گرین شرٹس کو ان تمام میچوں میں مسلسل شکست کا سامنا کرنا پڑا ہے۔

آج جب پاکستانی ٹیم روایتی حریف بھارت کے خلاف میدان میں اترے گی، تو اس کی اولین کوشش ہوگی کہ وہ ایونٹ میں اپنی پہلی کامیابی حاصل کر کے مسلسل شکستوں کے اس مایوس کن سلسلے کو توڑے۔ گرین شرٹس اس اہم میچ کو جیت کر نہ صرف ٹورنامنٹ میں اپنا کھاتا کھولنا چاہتے ہیں بلکہ ہاکی کے مداحوں کو بھی ایک شاندار فتح کی خوشی کا موقع فراہم کرنے کے لیے پرعزم ہیں۔