نیا سال 2026 پاک امریکا تعلقات کے لیے امیدوں کا پیامبر ہوگا: سفیر پاکستان رضوان سعید شیخ

امریکہ میں پاکستان کے سفیر رضوان سعید شیخ نے نئے سال 2026 کی آمد پر خصوصی تہنیتی پیغام جاری کرتے ہوئے کہا ہے کہ سال 2025 پاک امریکا تعلقات میں بے مثال مثبت تبدیلی کا سال ثابت ہوا۔

واشنگٹن ڈی سی میں پاکستانی سفارت خانے کی جانب سے جاری پیغام میں سفیر پاکستان کا کہنا تھا کہ تقریباً آٹھ دہائیوں پر محیط پاک امریکا تعلقات میں گزشتہ سال نمایاں پیش رفت دیکھنے میں آئی، جس نے دونوں ممالک کے درمیان تعاون کے نئے دروازے کھولے ہیں۔

رضوان سعید شیخ کے مطابق پاک امریکا دیرینہ تعلقات کو طویل المدتی شراکت داری میں ڈھالنے کے لیے آئی ٹی، معدنیات، توانائی، سیاحت سمیت متعدد نئے شعبہ جات کی نشاندہی کی گئی ہے، جہاں دوطرفہ مفادات میں شراکت داری وقت کی کسوٹی پر پوری اترے گی۔

انہوں نے کہا کہ سال 2025 کے دوران دونوں ممالک کی اعلیٰ قیادت کے مابین متعدد روابط قائم ہوئے، جو باہمی اعتماد اور تعاون کے فروغ کا مظہر ہیں۔
سفیر پاکستان نے اس بات پر زور دیا کہ دنیا کے دو بڑے اور بڑی آبادی کے حامل ممالک کے مابین دیرپا تعلقات کے قیام کے لیے عوامی سطح پر روابط اور کاروباری تعاون کو مزید فروغ دینا ناگزیر ہے۔

رضوان سعید شیخ کا کہنا تھا کہ پائیدار اور مضبوط دوطرفہ تعلقات کے حصول کے لیے قابلِ عمل لائحہ عمل پر یکسوئی کے ساتھ کام کرنے کی ضرورت ہے، اور امید ہے کہ آئندہ برس ہم ان کوششوں کی کامیابیوں کا جائزہ لے رہے ہوں گے۔

اپنے پیغام کے اختتام پر سفیر پاکستان نے پاکستانی نژاد امریکی کمیونٹی اور امریکی قوم کو نئے سال 2026 کی مبارکباد دیتے ہوئے کہا:
پاکستان زندہ باد، پاک امریکا دوستی پائندہ باد۔