فلسطینیوں کی جبری بے دخلی کسی صورت قبول نہیں، پاکستان کا دو ٹوک مؤقف

نیویارک: اقوام متحدہ میں پاکستان کے مستقل مندوب عاصم افتخار احمد نے کہا ہے کہ فلسطینیوں کی جبری بے دخلی کسی صورت قبول نہیں کی جائے گی۔

پاکستان اور اقوام متحدہ کے 85 رکن ممالک نے مغربی کنارے میں یہودی بستیوں کے پھیلاؤ کی مذمت کرتے ہوئے اسے بین الاقوامی قانون کی خلاف ورزی قرار دیا۔عاصم افتخار احمد کا کہنا تھا کہ مغربی کنارے میں نئی بستیوں کا قیام یو این چارٹر اور عالمی قوانین کے منافی ہے۔ انہوں نے اسرائیل کی جانب سے مغربی کنارے کو اپنی ملکیت قرار دینے کے اقدام کو مسترد کرتے ہوئے کہا کہ یہ اقدامات امن کوششوں کو نقصان پہنچا رہے ہیں۔انہوں نے اس بات پر زور دیا کہ پاکستان فلسطین کے مسئلے کے حل کے لیے دو ریاستی حل کی حمایت جاری رکھے گا۔ ان کے مطابق اسرائیلی اقدامات نہ صرف خطے میں کشیدگی بڑھا رہے ہیں بلکہ ممکنہ امن معاہدے کو بھی خطرے میں ڈال رہے ہیں۔پاکستانی مندوب نے مطالبہ کیا کہ اسرائیل فوری طور پر اپنے غیر قانونی اقدامات واپس لے اور بین الاقوامی قوانین کی پاسداری کرے۔