پاکستان کا اقوامِ متحدہ میں دو ٹوک مؤقف: اسرائیلی آباد کاروں کے فلسطینیوں پر حملوں کی شدید مذمت

نیویارک: اقوامِ متحدہ میں پاکستان کے مستقل مندوب عاصم افتخار نے پریس بریفنگ کے دوران مقبوضہ فلسطین میں اسرائیلی آباد کاروں کے بڑھتے ہوئے تشدد اور غیر قانونی آباد کاری کے خلاف پاکستان کا بھرپور مؤقف پیش کیا ہے۔ انہوں نے مطالبہ کیا کہ اسرائیل مقبوضہ فلسطینی سرزمین میں تمام آباد کاری کی سرگرمیاں فوری طور پر بند کرے اور عالمی قوانین کا احترام کرے۔

عاصم افتخار نے سلامتی کونسل کی قراردادوں کا حوالہ دیتے ہوئے کہا کہ مقبوضہ فلسطینی علاقوں کی جغرافیائی اور آبادیاتی حیثیت (Demographic structure) بدلنے کی تمام اسرائیلی کوششیں بین الاقوامی قانون کی صریح خلاف ورزی ہیں اور یہ ناقابلِ قبول ہیں۔ انہوں نے واضح کیا کہ سلامتی کونسل پہلے ہی ایسے اقدامات کی مذمت کر چکی ہے جو خطے میں دیرپا امن کے امکانات کو خطرے میں ڈالتے ہیں۔

پاکستان کے ہمراہ بحرین، ڈنمارک، فرانس، یونان، لٹویا، صومالیہ اور برطانیہ نے بھی اسرائیلی اقدامات کی مخالفت کی ہے۔ عاصم افتخار کا کہنا تھا کہ عالمی برادری کو اسرائیلی تشدد روکنے کے لیے اپنا اثر و رسوخ استعمال کرنا چاہیے تاکہ معصوم فلسطینیوں کا تحفظ یقینی بنایا جا سکے اور خطے میں قیامِ امن کی راہ ہموار ہو۔