سپریم کورٹ: شریعت اپیلیٹ بینچ میں کوٹہ سسٹم کیس کی سماعت، فیصلہ اپریل تک ملتوی

سپریم کورٹ آف پاکستان کے شریعت اپیلیٹ بینچ نے وفاقی شرعی عدالت کی جانب سے کوٹہ سسٹم کو غیر شرعی قرار دینے کے خلاف اپیل پر سماعت کی۔ پانچ رکنی بینچ کی سربراہی جسٹس جمال مندوخیل نے کی جبکہ جسٹس عرفان سعادت بھی بینچ کا حصہ تھے۔ عدالت نے کیس کی سماعت اپریل کے پہلے ہفتے تک ملتوی کر دی اور فریقین کو نوٹس جاری کیے۔
سماعت کے دوران پیش رفت
سماعت کے دوران جسٹس جمال مندوخیل نے کہا:
“یہ ایک اہم معاملہ ہے، آپ نے بتانا ہے کہ کوٹہ سسٹم اسلام کے اصولوں کے مطابق ہے؟”
ایڈیشنل اٹارنی جنرل نے مؤقف اختیار کیا کہ آرٹیکل 27 میں کوٹہ سسٹم واضح طور پر بیان کیا گیا ہے اور اس حوالے سے قانون سازی کا اختیار پارلیمنٹ کو حاصل ہے۔ انہوں نے مزید کہا کہ کوٹہ سسٹم کے دورانیے کو بڑھانے کے لیے قانون سازی ہوچکی ہے۔
جسٹس جمال مندوخیل نے اس موقع پر نوٹ کیا کہ کوٹہ سسٹم کا 40 سالہ دورانیہ ختم ہوچکا ہے۔ جسٹس عرفان سعادت نے کہا کہ صوبوں کی آبادی کے تناسب سے کوٹہ سسٹم نافذ ہے۔ ایڈیشنل اٹارنی جنرل نے بھی تصدیق کی کہ اس تناسب کے مطابق کوٹہ سسٹم پر عمل درآمد کیا جا رہا ہے۔