پاکستان کا افغان ناظم الامور کو طلب کر کے شدید احتجاج، دہشت گردی پر ‘دو ٹوک’ پیغام

پاکستان نے افغان سرزمین سے ہونے والی مسلسل دہشت گردی پر سخت موقف اختیار کرتے ہوئے افغان نائب سفیر (ناظم الامور) کو دفترِ خارجہ طلب کیا اور انہیں ایک سخت ترین احتجاجی مراسلہ تھما دیا۔ پاکستان نے واضح کیا ہے کہ وہ اپنے شہریوں اور سرحدوں کے دفاع کے لیے کسی بھی حد تک جانے کے لیے تیار ہے۔

دفترِ خارجہ کے ترجمان کے مطابق، 16 فروری کو باجوڑ میں ہونے والے ہولناک حملے، جس میں 11 پاکستانی جوان شہید ہوئے، پر شدید احتجاج ریکارڈ کرایا گیا۔ پاکستان نے دو ٹوک الفاظ میں کہا کہ باجوڑ میں ہونے والے خودکش حملے اور ‘فائر ریڈ’ کی ذمہ دار ‘فتنة الخوارج’ (ٹی ٹی پی) ہے، جس کی قیادت افغانستان میں مقیم ہے اور وہاں سے آزادانہ طور پر اپنی کارروائیاں جاری رکھے ہوئے ہے۔

مراسلے میں اس بات پر گہری تشویش کا اظہار کیا گیا کہ طالبان حکومت کی بارہا یقین دہانیوں کے باوجود زمین پر کوئی ٹھوس ایکشن نظر نہیں آیا۔ پاکستان نے مطالبہ کیا کہ افغان حکومت اپنی سرزمین پر موجود دہشت گرد گروہوں کے خلاف فوری اور تصدیق شدہ کارروائی کرے۔ ترجمان نے واضح پیغام دیتے ہوئے کہا:

“پاکستان دہشت گردوں اور ان کے سہولت کاروں کو کہیں بھی نشانہ بنانے کا حق محفوظ رکھتا ہے۔ ہم اپنی سرحدوں کی حفاظت کے لیے کسی بھی اقدام سے گریز نہیں کریں گے۔”