افغان سرزمین سے دہشت گرد حملوں پر پاکستان کا افغان طالبان حکومت سے سخت احتجاج

پاکستان نے شمالی وزیرستان میں واقع ایک فوجی کیمپ پر خوارج سے تعلق رکھنے والے خوارجی گل بہادر گروپ کے دہشت گرد حملے کی سخت ترین الفاظ میں مذمت کی ہے، جس کے نتیجے میں پاکستان کے چار فوجی جوان شہید ہوئے۔

اس واقعے پر شدید احتجاج ریکارڈ کرانے کے لیے افغان ڈپٹی ہیڈ آف مشن کو وزارتِ خارجہ طلب کیا گیا، جہاں انہیں پاکستان کے سخت تحفظات سے آگاہ کیا گیا۔

وزارتِ خارجہ نے افغان طالبان حکومت کی جانب سے فتنہ الخوارج/کالعدم تحریکِ طالبان پاکستان (FAK/TTP) کو مسلسل حمایت اور سہولت کاری پر گہری تشویش کا اظہار کیا۔ پاکستان کا مؤقف ہے کہ اسی معاونت کے باعث یہ عناصر پاکستان-افغان سرحدی علاقوں اور ملحقہ علاقوں میں پاکستان کی فوج اور عام شہریوں کے خلاف دہشت گرد حملے کرنے میں کامیاب ہو رہے ہیں۔

پاکستان نے واضح کیا کہ افغانستان میں فتنہ الخوارج/ٹی ٹی پی کو حاصل سازگار ماحول، افغانستان کی بین الاقوامی ذمہ داریوں اور پاکستان کے ساتھ کیے گئے ان وعدوں کے سراسر منافی ہے، جن کے تحت افغان حکومت نے یقین دہانی کرائی تھی کہ وہ اپنی سرزمین کسی دوسرے ملک، خصوصاً پاکستان، کے خلاف استعمال نہیں ہونے دے گی۔

پاکستان نے افغان سرزمین سے ہونے والے دہشت گرد حملوں کی مکمل تحقیقات اور ان میں ملوث عناصر اور سہولت کاروں کے خلاف فیصلہ کن کارروائی کا مطالبہ کیا ہے۔

افغان طالبان حکومت پر زور دیا گیا ہے کہ وہ اپنی سرزمین سے سرگرم تمام دہشت گرد گروہوں، بشمول ان کی قیادت، کے خلاف فوری، ٹھوس اور قابلِ تصدیق اقدامات کرے اور پاکستان کے خلاف دہشت گردی کے لیے افغان سرزمین کے مسلسل استعمال کو روکے۔

مزید یہ بھی واضح کر دیا گیا کہ پاکستان اپنی خودمختاری کے دفاع اور اپنے شہریوں کے تحفظ کا حق محفوظ رکھتا ہے اور افغان سرزمین سے جنم لینے والی دہشت گردی کے خلاف جواب دینے کے لیے تمام ضروری اقدامات کرے گا۔