پاکستان سٹاک مارکیٹ میں شدید مندی، ہنڈرڈ انڈیکس 3 حدیں گر گیا

کراچی/ٹوکیو: مشرقِ وسطیٰ کی غیر یقینی صورتحال نے عالمی مالیاتی منڈیوں کے ساتھ ساتھ پاکستان سٹاک ایکسچینج کو بھی اپنے حصار میں لے لیا ہے۔ کاروباری ہفتے کے آغاز پر اگرچہ مارکیٹ میں زبردست تیزی دیکھی گئی اور انڈیکس 1 لاکھ 48 ہزار 201 پوائنٹس کی سطح پر آ گیا تھا، تاہم عالمی دباؤ اور علاقائی تناؤ کے باعث مارکیٹ منفی زون میں چلی گئی اور انڈیکس نے اپنی تین اہم حدیں گنوا دیں۔

یاد رہے کہ گزشتہ ہفتے کے اختتام پر ہنڈرڈ انڈیکس 1 لاکھ 51 ہزار 707 پوائنٹس کی بلند ترین سطح پر بند ہوا تھا۔ ماہرین کا کہنا ہے کہ مشرقِ وسطیٰ میں جنگی خطرات کے باعث سرمایہ کاروں میں بے یقینی پھیلی ہوئی ہے جس کا اثر براہِ راست ایشیائی مارکیٹ پر بھی پڑا ہے۔

بین الاقوامی سطح پر جاپان کا نکئی انڈیکس (Nikkei) ساڑھے 5 فیصد، جبکہ جنوبی کوریا کا کوسپی انڈیکس (Kospi) 5 فیصد تک گر گیا۔ اس کے علاوہ چین، ہانگ کانگ اور ملائیشیا کی مارکیٹوں میں بھی ایک سے ڈیڑھ فیصد تک مندی ریکارڈ کی گئی۔ عالمی تجزیہ کاروں کے مطابق جب تک مشرقِ وسطیٰ میں استحکام نہیں آتا، مالیاتی منڈیوں میں اتار چڑھاؤ کا یہ سلسلہ جاری رہ سکتا ہے۔