پاکستان کے لیے تاریخی سنگِ میل، 2026 میں پہلا پاکستانی خلاباز چین کے خلائی اسٹیشن جائے گا: سپارکو

پاکستان اسپیس اینڈ اپر ایٹموسفیئر کمیشن (سپارکو) نے خلائی تحقیق اور خلائی سائنس کے شعبے میں سال 2025 کو پاکستان کے لیے ایک تاریخی سنگِ میل قرار دیتے ہوئے اعلان کیا ہے کہ 2026 میں پاکستان کا پہلا خلاباز چین کے خلائی اسٹیشن پر بھیجا جائے گا۔

ترجمان سپارکو کے مطابق پاکستان میں خلائی سائنس کے میدان میں 2025 غیر معمولی کامیابیوں کا سال ثابت ہوا، جس دوران قومی خلائی ایجنسی نے تین بڑے پاکستانی سیٹلائٹس کامیابی سے خلا میں بھیجے۔

بیان میں بتایا گیا کہ جنوری 2025 میں پاکستان کا پہلا الیکٹرو آپٹیکل سیٹلائٹ چین سے خلا میں روانہ کیا گیا، جبکہ جولائی 2025 میں ایک اور ریموٹ سینسنگ سیٹلائٹ چین کے لانچ سینٹر سے خلا میں بھیجا گیا، جس سے پاکستان کی زمینی مشاہداتی صلاحیت میں نمایاں اضافہ ہوا۔

ترجمان کے مطابق اکتوبر 2025 میں سپارکو نے پاکستان کا پہلا ہائپر اسپیکٹرل سیٹلائٹ خلا میں بھیجا، جس کے بعد خلا میں موجود پاکستانی سیٹلائٹس کی مجموعی تعداد سات ہوگئی۔

انہوں نے مزید بتایا کہ اسی سال پاکستان کے ایسٹروناٹ پروگرام کا باقاعدہ آغاز بھی کیا گیا، جو خلائی میدان میں ایک بڑی پیش رفت ہے۔

ترجمان سپارکو کا کہنا تھا کہ پاکستان کا پہلا خلاباز 2026 میں چین کے خلائی اسٹیشن پر روانہ کیا جائے گا، جبکہ اسی سال چاند پر تحقیق کے لیے روور پروگرام کا آغاز بھی کیا گیا ہے۔ ان کے مطابق پاکستان میں تیار کردہ روور 2028 میں چین کے تعاون سے چاند پر اتارا جائے گا۔