امریکا میں پاکستانی چاول کی برآمدات بڑھانے کیلئے نیویارک میں اہم تقریب

پاکستان کے نیویارک میں قائم قونصل خانے کی جانب سے رائس ایکسپورٹرز ایسوسی ایشن آف پاکستان کے وفد کے اعزاز میں ایک خصوصی رابطہ تقریب کا اہتمام کیا گیا، جس میں نیویارک، نیو جرسی اور پنسلوانیا سے تعلق رکھنے والے اہم درآمد کنندگان اور تقسیم کاروں نے شرکت کی۔

وفد کی قیادت رائس ایکسپورٹرز ایسوسی ایشن آف پاکستان کے چیئرمین فیصل جہانگیر نے کی۔ وفد 7 سے 9 مئی 2026 تک امریکا کے دورے پر ہے، جس کا مقصد پاکستانی چاول کی برآمدات میں اضافے کے نئے مواقع تلاش کرنا ہے۔

تقریب میں امریکا میں کام کرنے والی 25 سے زائد نمایاں کاروباری کمپنیوں کے نمائندے شریک ہوئے۔ اس موقع پر قونصل جنرل عامر احمد اٹوزئی نے خطاب کرتے ہوئے کہا کہ پاکستان معیاری چاول کی برآمد کے حوالے سے وسیع صلاحیت رکھتا ہے اور امریکی شراکت داروں کے ساتھ تجارتی روابط مزید مضبوط بنائے جا سکتے ہیں۔

تجارتی و سرمایہ کاری مشیر عدنان محمود اعوان نے وفد کے دورے کے مقاصد پر روشنی ڈالتے ہوئے کہا کہ اس دورے کا مقصد منڈی تک رسائی بہتر بنانا، تجارتی رکاوٹوں کا جائزہ لینا اور طویل مدتی کاروباری تعلقات کو فروغ دینا ہے۔

شرکا کے درمیان مارکیٹ میں قیمتوں، معیار اور دیگر تجارتی امور پر تفصیلی گفتگو بھی ہوئی، جبکہ پاکستانی وفد نے عالمی معیار کے مطابق فراہمی کو یقینی بنانے کے عزم کا اعادہ کیا۔

تقریب کے اختتام پر عشائیے کا اہتمام بھی کیا گیا، جہاں شرکا کو باہمی روابط مزید مضبوط بنانے کا موقع ملا۔