نورستان جھڑپ، پاکستان نے افغان طالبان کے الزامات مسترد کر دیے: وزراتِ اطلاعات

پاکستان نے نورستان میں ہونے والی مبینہ جھڑپوں سے متعلق افغان طالبان حکومت کی طرف سے عائد کردہ تمام الزامات کو سرے سے مسترد کرتے ہوئے انہیں سراسر بے بنیاد، من گھڑت اور حقائق کے منافی قرار دیا ہے۔

وزارتِ اطلاعات و نشریات کے جاری کردہ بیان کے مطابق، پاکستان کا نورستان یا افغانستان کے کسی بھی دوسرے حصے میں ہونے والی اندرونی جھڑپوں سے دوردور تک کوئی تعلق نہیں ہے۔ پاکستانی حکام نے دوٹوک الفاظ میں واضح کیا کہ پاکستانی سکیورٹی فورسز یا انٹیلی جنس اداروں کے نورستان میں کسی بھی کارروائی میں ملوث ہونے کے دعوے سراسر جھوٹے ہیں، جبکہ سابق افغان اہلکاروں کی تربیت یا بھرتی اور داعش سمیت کسی بھی دہشت گرد گروہ کی مبینہ سہولت کاری کے تمام الزامات بھی مسترد کیے جاتے ہیں۔

بیان میں اس بات پر زور دیا گیا کہ افغان حکومت کی جانب سے پاکستان کے ملوث ہونے کا آج تک کوئی بھی قابلِ تصدیق ثبوت پیش نہیں کیا گیا، اور نہ ہی ان الزامات کے حق میں کسی افراد کی شناخت، کوئی سرکاری دستاویزات، مواصلاتی ریکارڈ یا فارنزک شواہد فراہم کیے گئے ہیں۔ سوشل میڈیا پر گردش کرنے والی مبینہ ویڈیوز بھی کسی بھی طرح پاکستان کے ساتھ اس کے تعلق کو ثابت کرنے سے قاصر ہیں۔

وزارتِ اطلاعات نے دوٹوک مؤقف اپنایا کہ اقوام متحدہ کی مسلسل رپورٹس خود اس بات کی نشاندہی کرتی رہی ہیں کہ افغانستان کی سرزمین پر متعدد خطرناک دہشت گرد تنظیمیں تاحال فعال ہیں، اور افغان سرزمین پر موجود یہ دہشت گرد گروہ پاکستان سمیت پورے خطے کی سلامتی کے لیے ایک بہت بڑا خطرہ بنے ہوئے ہیں۔

حکام کا کہنا تھا کہ خود دہشت گردوں کو پناہ دینے والی طالبان حکومت کی جانب سے الٹا پاکستان پر اس قسم کے الزامات عائد کرنا انتہائی باعثِ تعجب ہے۔ افغان حکومت کو چاہیے کہ وہ اپنی داخلی سلامتی کے سنگین مسائل کی ذمہ داری پاکستان پر ڈالنے کے بجائے خود اپنی سرزمین پر موجود دہشت گرد تنظیموں کے خلاف ٹھوس اور قابلِ تصدیق کارروائیاں عمل میں لائے۔ حکومتِ پاکستان نے ایک بار پھر مطالبہ کیا ہے کہ افغان طالبان حکومت کو دوحہ معاہدے اور اپنے اس وعدے کی سختی سے پاسداری کرنی چاہیے کہ افغان سرزمین کو پاکستان یا کسی بھی دوسرے ملک کے خلاف دہشت گردی کے لیے استعمال نہیں ہونے دیا جائے گا۔