پاکستان اور قطر کی ثالثی کی کوششیں، ایران امریکا مذاکرات آج دوحہ میں متوقع

پاکستان اور قطر کی کامیاب ثالثی کوششوں کے نتیجے میں دونوں ممالک کے سفارتی رابطوں میں اہم پیشرفت ہوئی ہے، جس کے تحت آج قطری دارالحکومت دوحہ میں امریکا اور ایران کے درمیان اہم مذاکرات متوقع ہیں۔

عرب میڈیا کے مطابق ایرانی مذاکراتی ٹیم اس وقت دوحہ میں موجود ہے جہاں ان مذاکرات کا آغاز ہوگا۔ ان اہم مذاکرات کے ایجنڈے میں ایران کے جوہری پروگرام پر تفصیلی بات چیت، آبنائے ہرمز سے محفوظ بحری آمدورفت کی بحالی اور تہران کے لیے مالی مراعات دینے کے معاملات سرفہرست شامل ہیں، جبکہ اس دوران طے پانے والے کسی بھی ممکنہ معاہدے کی ضمانت چین اور روس کی جانب سے دیے جانے کا امکان ہے۔

دوسری جانب، اگرچہ ایرانی وزیر خارجہ نے فی الحال امریکی حکام کے ساتھ براہِ راست ملاقات یا مذاکرات کے امکان کو مسترد کرتے ہوئے مؤقف اپنایا ہے کہ امریکا کے ساتھ باضابطہ مذاکرات کا فیصلہ ان کے مطالبات اور شرائط کی منظوری کے بعد ہی کیا جائے گا، تاہم ان کا کہنا تھا کہ جوہری معاملے پر مذاکرات کا دوسرا مرحلہ جاری ہے اور وہ ثالثی ممالک کی پیش کردہ تجاویز کا بغور جائزہ لے رہے ہیں۔ یاد رہے کہ آبنائے ہرمز کو مکمل طور پر کھولنے کے لیے ایران کی اہم شرائط میں اسلام آباد مفاہمتی یادداشت کے بعد تہران پر عائد کی جانے والی تمام اقتصادی پابندیوں کا خاتمہ بھی شامل ہے۔