پاکستان کی تمام بندرگاہوں کے داخلے عارضی طور پر بند کرنے کا نوٹیفکیشن جعلی قرار

سوشل میڈیا پر پاکستان کی تمام بندرگاہوں کے داخلے عارضی طور پر بند کرنے کے حوالے سے گردش کرنے والے ایک نوٹیفکیشن کو حکومت نے مکمل طور پر جعلی اور من گھڑت قرار دے دیا ہے۔

وزارتِ اطلاعات و نشریات نے سماجی رابطے کی ویب سائٹ ایکس (ٹویٹر) پر جاری ایک وضاحت میں کہا ہے کہ کابینہ ڈویژن یا وزارتِ بحری امور کی جانب سے بندرگاہوں کے داخلے معطل کرنے کا کوئی حکم جاری نہیں کیا گیا۔ حکام نے واضح کیا کہ 10 مارچ 2026 تک بندرگاہیں بند کرنے کی خبریں بے بنیاد ہیں اور سوشل میڈیا پر وائرل ہونے والا نوٹیفکیشن جعلی ہے۔

بیان میں مزید کہا گیا ہے کہ اس قسم کی “فیک نیوز” کا مقصد عوام میں بے چینی اور خوف و ہراس پھیلانا ہے۔ وزارت نے شہریوں اور تاجر برادری پر زور دیا ہے کہ وہ ایسی غیر مصدقہ خبروں پر کان نہ دھریں اور کسی بھی معلومات کی تصدیق کے لیے صرف مستند سرکاری ذرائع اور پورٹلز پر ہی انحصار کریں۔

حکومتی ترجمان کے مطابق ملک کی تمام بندرگاہیں معمول کے مطابق فعال ہیں اور بحری تجارت یا آمد و رفت پر کوئی پابندی عائد نہیں کی گئی۔ انتظامیہ نے خبردار کیا ہے کہ افواہیں پھیلانے والے عناصر کے خلاف قانونی کارروائی بھی عمل میں لائی جا سکتی ہے۔