پیٹرولیم مصنوعات کی بلا تعطل فراہمی کیلئے اسٹیٹ بینک کا اقدام، خام تیل کی درآمد میں عارضی نرمی

اسٹیٹ بینک آف پاکستان نے ملک میں پیٹرولیم مصنوعات کی مسلسل فراہمی یقینی بنانے کے لیے اہم اقدام کرتے ہوئے خام تیل اور دیگر پیٹرولیم مصنوعات کی درآمد میں عارضی سہولت فراہم کر دی ہے۔

مرکزی بینک کی جانب سے جاری سرکلر کے مطابق 60 روز کے لیے سی آئی ایف بنیاد پر خام تیل اور پیٹرولیم مصنوعات کی درآمد کی اجازت دے دی گئی ہے۔

اسٹیٹ بینک کا کہنا ہے کہ مجاز ڈیلرز اور کمرشل بینک فارن ایکسچینج مینوئل کے باب 13 کی شق 5 کے تحت اس عارضی نرمی کو درآمدی لین دین پر لاگو کریں گے۔

مرکزی بینک کے مطابق سرکلر کے اجرا کی تاریخ سے آئندہ 60 دن تک سی آئی ایف بنیاد پر درآمدات کی اجازت برقرار رہے گی جبکہ تمام بینکوں کو ہدایت دی گئی ہے کہ وہ اس فیصلے سے متعلق اپنے صارفین اور درآمد کنندگان کو فوری طور پر آگاہ کریں۔

اسٹیٹ بینک نے مزید کہا کہ تمام بینک نئی ہدایات پر سختی سے عمل درآمد یقینی بنائیں۔

مرکزی بینک کے مطابق اس اقدام سے پاکستانی تیل درآمد کنندگان کو لاجسٹکس اور انشورنس سے متعلق ممکنہ خطرات میں کمی آئے گی جبکہ اس فیصلے کا مقصد پیٹرولیم مصنوعات کی فراہمی میں کسی بھی ممکنہ تعطل کو روکنا اور ملک میں تیل کی دستیابی برقرار رکھنا ہے۔