پاکستان میں 377روپے فی لیٹر پیٹرول میں 142 روپے سے زائد ٹیکس اور مارجنز شامل

پیٹرول کی قیمت میں حالیہ کمی کے باوجود سامنے آنے والی سرکاری دستاویزات سے معلوم ہوا ہے کہ صارفین سے ایک لیٹر پیٹرول پر 142 روپے 41 پیسے کی لیوی اور مختلف مارجنز وصول کیے جا رہے ہیں۔

دستاویزات کے مطابق پیٹرول کی ایکس ریفائنری قیمت 235 روپے 37 پیسے فی لیٹر بنتی ہے، جبکہ عوام کو یہی پیٹرول 377 روپے 78 پیسے فی لیٹر میں فراہم کیا جا رہا ہے۔

اعداد و شمار کے مطابق قیمت میں اضافے کی بڑی وجہ مختلف حکومتی محصولات اور مارجنز ہیں، جن میں سب سے زیادہ حصہ پیٹرولیم لیوی کا ہے۔

سرکاری ریکارڈ کے مطابق ایک لیٹر پیٹرول پر 116 روپے 08 پیسے پیٹرولیم لیوی وصول کی جا رہی ہے، جبکہ ماحولیاتی معاونت لیوی کی مد میں مزید 2 روپے 50 پیسے شامل کیے گئے ہیں۔

ماہرین کا کہنا ہے کہ قیمتوں میں کمی کے باوجود بھاری محصولات کے باعث عوام کو خاطر خواہ ریلیف نہیں مل پاتا، جبکہ پیٹرول کی اصل قیمت اور فروختی نرخ میں نمایاں فرق برقرار رہتا ہے۔

دوسری جانب عوامی حلقوں کی جانب سے مطالبہ کیا جا رہا ہے کہ پیٹرولیم مصنوعات پر عائد محصولات میں کمی کر کے عوام کو مزید ریلیف فراہم کیا جائے۔