بیرون ملک جانے والوں کی تعداد میں نمایاں اضافہ، وزارت خزانہ رپورٹ جاری

اسلام آباد: وفاقی وزارت خزانہ نے ماہانہ معاشی اپ ڈیٹ رپورٹ جاری کرتے ہوئے بتایا ہے کہ بیرون ملک روزگار کے لیے رجسٹریشن کروانے والے پاکستانیوں کی تعداد میں سالانہ بنیاد پر 19 فیصد اضافہ ہوا ہے۔

رپورٹ کے مطابق جنوری 2026 کے دوران 75 ہزار 663 افراد نے بیرون ملک ملازمت کے لیے اندراج کرایا، جبکہ گزشتہ سال اسی ماہ یہ تعداد 63 ہزار 559 تھی۔

وزارت خزانہ کا کہنا ہے کہ ملکی معیشت میں استحکام آیا ہے، مہنگائی کے دباؤ میں کمی ہوئی ہے اور کاروباری سرگرمیوں میں بہتری دیکھی جا رہی ہے۔ 38 ارب روپے کا رمضان ریلیف پیکج بھی عوام کو فراہم کیا گیا۔

اعداد و شمار کے مطابق بڑی صنعتوں کی پیداوار میں 6 ماہ کے دوران 4.8 فیصد اضافہ ہوا جبکہ مالی سال کے پہلے 7 ماہ میں ترسیلات زر 11.3 فیصد بڑھ کر 23.2 ارب ڈالر تک پہنچ گئیں۔ برآمدات میں 5.5 فیصد کمی اور درآمدات میں 9.8 فیصد اضافہ ریکارڈ کیا گیا۔

رپورٹ میں مزید بتایا گیا کہ پالیسی ریٹ کم ہو کر 10.5 فیصد کی سطح پر آ گیا ہے، نجی شعبے کو قرضوں کی فراہمی 638 ارب روپے رہی اور پاکستان اسٹاک ایکسچینج 48 فیصد بہتری کے بعد ایک لاکھ 68 ہزار 893 پوائنٹس پر پہنچ گئی۔ نئی کمپنیوں کی رجسٹریشن میں 26 فیصد اضافہ ہوا اور 25 ہزار 554 کمپنیاں رجسٹر ہوئیں۔