ڈیجیٹل پاکستان کی جانب اہم پیش رفت، سوا دو لاکھ سے زائد افراد کی آن لائن حج رجسٹریشن

ڈیجیٹل پاکستان کے وژن کے تحت حج رجسٹریشن کے عمل میں ایک بڑی اور اہم پیش رفت سامنے آئی ہے، جہاں صرف دو ہفتوں کے دوران 2 لاکھ 32 ہزار سے زائد افراد نے گھر بیٹھے آن لائن حج رجسٹریشن مکمل کر لی ہے۔

وزارت مذہبی امور کے مطابق حج 2027 سے 2030 تک کے لیے آن لائن رجسٹریشن کا عمل تاحال کامیابی سے جاری ہے۔ پہلے 14 روز کے دوران عازمین نے نیشنل آئی ٹی بورڈ کی تیار کردہ “پاک حج ایپ” اور آن لائن پورٹل کے ذریعے چند منٹوں میں اپنا اندراج مکمل کیا۔ اعداد و شمار کے مطابق، اب تک 1 لاکھ 75 ہزار سے زائد عازمین نے سرکاری حج اسکیم جبکہ 58 ہزار سے زائد افراد نے نجی حج اسکیم کا انتخاب کیا ہے۔

صوبائی ترتیب کے لحاظ سے پنجاب سے 1 لاکھ 8 ہزار، سندھ سے 71 ہزار اور خیبر پختونخوا سے 33 ہزار عازمین نے رجسٹریشن کرائی ہے۔ رجسٹرڈ ہونے والے عازمین میں 1 لاکھ 36 ہزار مرد اور 96 ہزار خواتین شامل ہیں۔ وزارت مذہبی امور نے واضح کیا ہے کہ نئی ہدایات جاری ہونے تک یہ آن لائن رجسٹریشن بلا تعطل جاری رہے گی، اور خواہشمند عازمین کو مشورہ دیا گیا ہے کہ وہ آخری دنوں کے رش سے بچنے کے لیے جلد از جلد اپنی رجسٹریشن مکمل کریں۔