عمان پر حالیہ حملوں کے بعد پاکستان کا اظہارِ یکجہتی، سفارت کاری کی بحالی پر زور

نائب وزیر اعظم و وزیر خارجہ سینیٹر محمد اسحاق ڈار نے عمان کے وزیر خارجہ بدر بن حمد البوسعیدی سے ٹیلی فون پر رابطہ کیا اور مشرق وسطیٰ اور وسیع تر خطے میں تیزی سے بدلتی ہوئی سنگین صورتحال پر تبادلہ خیال کیا۔

دفترِ ترجمان دفتر خارجہ کے مطابق گفتگو کے دوران اسحاق ڈار نے خطے میں مکالمے اور کشیدگی میں کمی کے فروغ کے لیے عمان کے تعمیری اور اصولی کردار کو سراہا۔ انہوں نے حالیہ حملوں کے پس منظر میں عمان کی حکومت اور عوام کے ساتھ پاکستان کی مکمل یکجہتی کا بھی اظہار کیا۔

اس موقع پر انہوں نے پاکستان کے موقف کو دہراتے ہوئے کہا کہ موجودہ صورتحال میں تحمل، فوری کشیدگی میں کمی اور سفارت کاری کی جانب واپسی انتہائی ضروری ہے۔

محمد اسحاق ڈار نے اس بات کا اعادہ کیا کہ پاکستان خطے اور عالمی سطح پر امن کے فروغ، کشیدگی کم کرنے اور استحکام کے لیے تمام کوششوں کی حمایت جاری رکھے گا۔