سرکاری حج سکیم دوسری قسط: 22 ہزار 172 عازمین نے ادائیگی مکمل کرلی

سرکاری حج سکیم کے تحت حج واجبات کی دوسری قسط کی وصولی کا عمل تیزی سے جاری ہے اور اب تک 22 ہزار 172 عازمینِ حج اپنی دوسری قسط کی ادائیگی مکمل کر چکے ہیں۔ ترجمان وزارتِ مذہبی امور کے مطابق دوسری قسط کی مد میں اب تک 14 ارب 17 کروڑ روپے موصول ہو چکے ہیں۔ عازمین میں آن لائن ادائیگیوں کے رجحان میں نمایاں اضافہ دیکھا گیا ہے، جہاں 12 ہزار 743 عازمین نے ون لنک (1Link) کے ذریعے گھر بیٹھے رقم جمع کرائی، 1 ہزار 89 افراد نے بینک کارڈز کا استعمال کیا، جبکہ 8 ہزار 340 عازمین نے مینول بینک چالان کے ذریعے ادائیگی کی۔ ڈیجیٹل حج پورٹل اور پاک حج ایپ کے ذریعے گھر بیٹھے آن لائن ادائیگی کا تناسب 55 فیصد سے تجاوز کر گیا ہے۔

وزارتِ مذہبی امور نے واضح کیا ہے کہ سرکاری حج سکیم کے عازمین کے لیے حج واجبات کی دوسری قسط جمع کرانے کی حتمی تاریخ 20 اکتوبر مقرر کی گئی ہے۔ ترجمان نے یاد دہانی کرائی کہ دوسری قسط کی ادائیگی سے قبل تمام عازمین کے لیے ڈیجیٹل حج پورٹل پر اپنا تصدیق شدہ میڈیکل فٹنس سرٹیفکیٹ اپ لوڈ کرنا لازمی قرار دیا گیا ہے۔ مقررہ تاریخ تک دوسری قسط جمع نہ کرانے کی صورت میں عازمین کی حج درخواست خودکار نظام کے تحت منسوخ کر دی جائے گی۔