پاکستان میں سعودیہ کو ٹیکس فری تیل ذخیرہ کرنے کی پیشکش

پاکستان نے سعودی عرب کے ساتھ توانائی اور تجارت کے شعبے میں تعاون کو مزید فروغ دیتے ہوئے سعودی کمپنیوں کو ’ٹیکس نیوٹرل بانڈڈ اسٹوریج پالیسی‘ کے تحت ملک میں تجارتی بنیادوں پر تیل کے ذخائر قائم کرنے کی شاندار پیشکش کر دی ہے۔

وفاقی وزیر پیٹرولیم علی پرویز ملک سے پاکستان میں سعودی عرب کے نئے سفیر ڈاکٹر راجح بن طامی البقامی نے اسلام آباد میں ایک اہم ملاقات کی، جس میں دونوں برادر ممالک کے درمیان معدنیات، پیٹرولیم اور توانائی کے شعبوں میں دوطرفہ تعاون اور نئی سرمایہ کاری بڑھانے پر تفصیلی تبادلہ خیال کیا گیا۔ اس ملاقات کے دوران پاکستان کی جانب سے بلوچستان کے اسٹریٹجک لحاظ سے اہم علاقے حب میں ایک بڑے پیٹرولیم ذخیرہ اور ریفائننگ کمپلیکس کے قیام کا منصوبہ بھی سعودی حکام کے سامنے پیش کیا گیا، جو دونوں ملکوں کے معاشی تعلقات میں ایک سنگِ میل ثابت ہو سکتا ہے۔