ایران و عراق جانے والے زائرین کے لیے نیا نظام متعارف

وزارتِ مذہبی امور و بین المذاہب ہم آہنگی نے پاکستان سے مقدس مقامات کی زیارت کے لیے ایران اور عراق جانے والے زائرین کی سہولت اور سفری انتظامات کو بہتر بنانے کے لیے نیا آن لائن رجسٹریشن سسٹم متعارف کرا دیا ہے۔ اس سلسلے میں وزارت نے زیارت گروپ آرگنائزرز کے لیے ‘زیڈ جی اوز’ (ZGOs) پورٹل کا باقاعدہ آغاز کر دیا ہے، جس کے بعد اب کوئی بھی غیر رجسٹرڈ فرد یا کمپنی زائرین کی بکنگ نہیں کر سکے گی۔ وزارت کی جانب سے جاری کردہ اعلامیے کے مطابق، نئی زیارت پالیسی 2026 کے تحت ملک بھر سے 262 زیارت گروپ آرگنائزرز کو رجسٹرڈ کیا گیا ہے اور اب صرف انھی مستند آپریٹرز کے ذریعے ہی زائرین کی بکنگ اور سفری معاملات طے کیے جائیں گے۔ رجسٹرڈ آرگنائزرز کی مکمل فہرست وزارتِ مذہبی امور کی آفیشل ویب سائٹ پر اپ لوڈ کر دی گئی ہے۔ وزارت نے زائرین کو سخت ہدایت کی ہے کہ وہ کسی بھی قسم کے نقصان یا دھوکہ دہی سے بچنے کے لیے صرف منظور شدہ کمپنیوں سے ہی رابطہ کریں، کیونکہ غیر مجاز افراد کے ساتھ لین دین کی صورت میں وزارت ذمہ دار نہیں ہو گی۔ اس اقدام کا بنیادی مقصد زائرین کو محفوظ، منظم اور شفاف سفری سہولیات فراہم کرنا اور غیر قانونی آپریٹرز کا خاتمہ کرنا ہے۔