فیلڈ مارشل عاصم منیر سے اردن کے چیئرمین جوائنٹ چیفس آف اسٹاف کی ملاقات

اردن کی مسلح افواج کے چیئرمین جوائنٹ چیفس آف اسٹاف میجر جنرل یوسف احمد نے جنرل ہیڈکوارٹرز (جی ایچ کیو) کا دورہ کیا، جہاں چیف آف ڈیفنس فورسز اور آرمی چیف فیلڈ مارشل عاصم منیر سے ان کی اہم ملاقات ہوئی۔

آئی ایس پی آر کے مطابق ملاقات کے دوران باہمی دلچسپی کے امور اور خطے کی سیکیورٹی صورتحال پر تفصیلی تبادلہ خیال کیا گیا، جبکہ دفاعی اور عسکری تعاون کو مزید فروغ دینے کے امکانات پر بھی بات چیت کی گئی۔

اس موقع پر معزز مہمان نے پاکستان کی مسلح افواج کی پیشہ ورانہ صلاحیتوں کو سراہا اور خطے میں امن و استحکام کے لیے ان کی خدمات کو خراجِ تحسین پیش کیا۔

فیلڈ مارشل عاصم منیر نے اردن کے ساتھ دفاعی تعلقات کو مزید مضبوط بنانے کے عزم کا اعادہ کرتے ہوئے بدلتے ہوئے سیکیورٹی چیلنجز سے نمٹنے کے لیے باہمی تعاون کی اہمیت پر زور دیا۔ ملاقات میں دونوں برادر ممالک کے درمیان عسکری سطح پر تعاون کو مزید وسعت دینے کے مشترکہ عزم کا بھی اعادہ کیا گیا۔