محسن نقوی کی اطالوی ہم منصب سے ملاقات، 10,500 ورک ویزوں پر اتفاق

وفاقی وزیر داخلہ محسن نقوی نے اطالوی ہم منصب میٹیو پینٹے ڈوسی سے ایک اہم ملاقات کی ہے، جس میں دونوں ممالک کے درمیان سکیورٹی تعاون اور قانونی ہجرت (Legal Migration) کو فروغ دینے پر اتفاق کیا گیا۔ اس ملاقات کا سب سے بڑا نتیجہ پاکستان کی ہنرمند افرادی قوت کے لیے 10 ہزار 500 ورک ویزے جاری کرنے کا فیصلہ ہے، جس سے پاکستانیوں کے لیے اٹلی میں روزگار کے نئے مواقع پیدا ہوں گے۔ اطالوی وزیر داخلہ نے محسن نقوی کی درخواست پر پاکستانی سفارتی پاسپورٹ ہولڈرز کو ویزا کی شرط سے استثنیٰ دینے پر بھی آمادگی ظاہر کی ہے۔

ملاقات کے دوران غیر قانونی امیگریشن، انسانی سمگلنگ اور منشیات کے خاتمے کے لیے مشترکہ کوششوں پر تفصیلی تبادلہ خیال کیا گیا۔ محسن نقوی نے اطالوی حکام کو بتایا کہ پاکستان کے ایئرپورٹس اور سمندری حدود پر سخت نگرانی کے باعث غیر قانونی امیگریشن میں نمایاں کمی آئی ہے، جسے اطالوی وزیر داخلہ نے بھرپور سراہا۔ اس موقع پر پنجاب پولیس کے افسران نے ‘پولیس خدمت مراکز گلوبل’ کی افادیت پر بریفنگ دی، جسے اطالوی وفد نے جدید دور کی ضرورت قرار دیتے ہوئے اس کی تعریف کی۔ اس اعلیٰ سطحی ملاقات میں سفیرِ پاکستان علی جاوید اور ڈی جی ایف آئی اے سمیت دیگر سینئر حکام بھی موجود تھے۔