انسانی حقوق کی آڑ میں بھارت اور کالعدم ایکشن کمیٹی کا گٹھ جوڑ بے نقاب

انسانی حقوق کے نام پر پاکستان مخالف سرگرمیوں اور عالمی سطح پر زہر افشانی کے لیے بھارت اور کالعدم جوائنٹ ایکشن کمیٹی کا مذموم گٹھ جوڑ ایک بار پھر بے نقاب ہو گیا ہے۔

انٹیلی جنس ذرائع کی جانب سے جاری ہونے والے سنسنی خیز انکشافات کے مطابق، اپریل 2026 میں لندن میں قائم بھارتی ہائی کمیشن نے ایک منظم سازشی منصوبے کے تحت کالعدم ایکشن کمیٹی کے نمائندوں سے رابطہ کیا۔ اس کے بعد جون 2026 میں بھارتی ہائی کمیشن کے عہدیدار پرمود کھیم چندانی اور بھارتی میڈیا ادارے ‘ٹائمز ناؤ’ کے صحافی زکا جیکب کے درمیان ایک اہم ملاقات ہوئی۔ اس ملاقات میں آزاد جموں و کشمیر میں بدامنی پھیلانے اور کالعدم جوائنٹ ایکشن کمیٹی کے من گھڑت بیانیے کی عالمی سطح پر تشہیر کے لیے ایک نئی تنظیم کے قیام پر غور کیا گیا۔

ذرائع کے مطابق 24 جون 2026 کو بھارتی ہائی کمیشن نے اظہر احمد، یاسر شفاعت اور ڈاکٹر اشتیاق خالق جیسے شرپسندوں کو آزاد کشمیر میں سکیورٹی حالات خراب کرنے کے لیے تیار کیا۔ اس تمام سازشی منصوبے کو عملی جامہ پہنانے کے لیے جون کے مہینے میں بھارتی ہائی کمیشن کی جانب سے ان شرپسندوں کو 17 واٹس ایپ کالز کی گئیں۔ بعد ازاں 30 جولائی 2026 کو برطانیہ میں انسانی حقوق کی آڑ میں ‘جموں کشمیر ہیومن رائٹس آرگنائزیشن’ (JKHRO) نامی این جی او رجسٹر کروائی گئی۔ پرمود کھیم چندانی خود اس کی رجسٹریشن میں نامزد پائے گئے، جس نے اس منصوبے کا پول کھول دیا۔

اس نام نہاد چار ماہ پرانی این جی او نے آزاد کشمیر میں جھوٹ پر مبنی رپورٹس تیار کیں اور ‘ٹائمز ناؤ’، ‘دی انڈیپنڈنٹ’ اور ‘کشمیر ٹائمز’ جیسے میڈیا اداروں کے ذریعے پاکستان مخالف زہریلے پروپیگنڈے کو دنیا بھر میں پھیلانے کی کوشش کی۔