جون تک زرمبادلہ ذخائرکا18ارب ڈالرکا ہدف پوراکیاجائے، آئی ایم ایف کاپاکستان سے مطالبہ

پاکستان اور آئی ایم ایف کے درمیان ورچوئل ششماہی اقتصادی جائزہ مذاکرات کا ایک اور سیشن ہوا۔جس کے دوران آئی ایم ایف کو معاشی صورت حال اور نئے بجٹ سے متعلق ٹیکس تجاویز  پر بریفنگ دی گئی۔

بریفنگ میں بتایاگیاکہ بہتری کے باوجود معاشی غیر یقینی اورخطرات برقرار ہیں، علاقائی کشیدگی کے باعث ملک میں مہنگائی بڑھنے کا خدشہ ہے۔ خوراک، ایندھن اور توانائی مہنگی ہونے سے مہنگائی میں مزید اضافے ہوسکتاہے۔

مذاکرات کے دوران یہ بات واضح کی گئی کہ تنخواہ دار طبقے کو ریلیف اورسپر ٹیکس کا خاتمہ آئی ایم ایف کی منظوری سے مشروط ہوگا۔جبکہ تنخواہ پر انکم ٹیکس میں پانچ فیصد ممکنہ کمی کیلئے آئی ایم ایف سے بھی منظوری لازمی قراردی گئی۔

حکام نے بریفنگ دیتے ہوئے کہاکہ اس وقت اسٹیٹ بینک کے زرمبادلہ کے ذخائر کی مالیت 16.3 ارب ڈالر ہے جس پر آئی ایم ایف نے جون تک زرمبادلہ کے ذخائر کا 18 ارب ڈالر کا ہدف پورا کرنے کا مطالبہ کردیا۔

حکام نے مزید بتایاکہ کارپوریٹ سیکٹراور امیر طبقے پرسپر ٹیکس اورپراپرٹی انکم پر ٹیکس میں کمی کی تجویز ہے۔اسی طرح پاکستانی برآمدات پر عائد ایک فیصد ایڈوانس ٹیکس بھی واپس لینے کی تجویز ہے۔مذاکرات کے دوران آئی ایم ایف سے نئے مالی سال کے بجٹ پر مزید مشاورت جاری رکھنے کا فیصلہ کیاگیا۔