معاشی ٹیم اور آئی ایم ایف کے درمیان آج سے اقتصادی جائزہ مذاکرات

پاکستان اور آئی ایم ایف کے درمیان 7 ارب ڈالر کے توسیعی فنڈ پروگرام (EFF) کے تحت تیسرے جائزے کے لیے مذاکرات کا باقاعدہ آغاز ہوگیا ہے۔ مشن چیف ایوا پیٹروا کی قیادت میں وفد نے وزیرِ خزانہ محمد اورنگزیب سے ملاقات کی، جس میں ملکی معاشی صورتحال اور مستقبل کے لائحہ عمل پر تبادلہ خیال کیا گیا۔ وزیرِ خزانہ نے وفد کو بریفنگ دیتے ہوئے بتایا کہ پاکستان میں میکرو اکنامک استحکام مضبوط ہو رہا ہے، افراطِ زر میں کمی آئی ہے اور برآمدات میں پائیدار ترقی کے آثار نمایاں ہیں۔ مذاکرات میں گورنر سٹیٹ بینک اور سیکرٹری خزانہ بھی شریک تھے جہاں مالیاتی نظم و ضبط اور ریزرو بفرز کی تعمیر نو پر تفصیلی بات چیت کی گئی۔