پاکستان، آئی ایم ایف کے درمیان قرض پروگرام کے چوتھے جائزے پر مذاکرات جاری

پاکستان اور بین الاقوامی مالیاتی فنڈ (آئی ایم ایف) کے درمیان 7 ارب ڈالر کے قرض پروگرام کے چوتھے جائزے پر مذاکرات کا سلسلہ جاری ہے، جس میں ٹیکس اصلاحات اور گڈ گورننس کے امور پر تفصیلی تبادلہ خیال کیا جا رہا ہے۔

ذرائع کے مطابق مذاکرات کے دوران آئی ایم ایف مشن کو سرکاری ملازمین کے اثاثے ظاہر کرنے کے نئے قانون اور ضوابط پر جامع بریفنگ دی گئی۔ اس سلسلے میں ایف بی آر، اسٹیبلشمنٹ ڈویژن اور فنانس ڈویژن کے اعلیٰ حکام نے آئی ایم ایف کے وفد سے اہم ملاقاتیں کیں۔

ملاقات کے دوران فیڈرل بورڈ آف ریوینیو (FBR) کی جانب سے کسٹمز اور انکم ٹیکس سے متعلق امور پر بریفنگ دی گئی، جبکہ کسٹمز اور انکم ٹیکس پالیسی ونگز کے حکام نے بھی وفد کو اپنے اہداف سے آگاہ کیا۔

آئی ایم ایف کو بریفنگ دیتے ہوئے بتایا گیا کہ نئے قانون کے تحت گریڈ 17 سے لے کر گریڈ 22 تک کے تمام سرکاری افسران اپنے اثاثے ظاہر کرنے کے پابند ہوں گے، اور سرکاری افسران کے اثاثوں کی یہ تفصیلات متعلقہ سرکاری ویب سائٹ پر بھی دستیاب ہوں گی تاکہ شفافیت کو یقینی بنایا جا سکے اور حکومت ان کے مالی طرز عمل کو مؤثر انداز میں ریگولیٹ اور مانیٹر کر سکے۔

مذاکرات میں سیکرٹری اسٹیبلشمنٹ ڈویژن اور سیکرٹری فنانس ڈویژن نے بھی خصوصی طور پر شرکت کی اور آئی ایم ایف کے وفد کو سول سرونٹس کے اثاثوں سے متعلق کی جانے والی قانون سازی سے تفصیلی آگاہ کیا۔